A UVigo lidera un proxecto europeo para crear unha plataforma dixital de alfabetización ambiental

O campus de Ourense acolle esta semana a xornada de lanzamento do proxecto europeo 5G: Stop Forest Fire For 5Green. Coordinado desde a Universidade de Vigo, o seu obxectivo é crear unha plataforma dixital de alfabetización ambiental na que se amosará a conexión entre o cambio climático e os incendios forestais e se porá de relevo a riqueza dos ecosistemas forestais e o seu impacto ambiental.

O proxecto arrancou oficialmente o pasado mes de setembro e prolongarase ata febreiro de 2027. Nel participan, ademais da UVigo, GBA UG (Alemaña); Eno Schoolnet ry (Finlandia); 1st Geniko Lykeio Pallinis “Pierre de Coubertin” (Grecia); Università Degli Studi di Padova (Italia) e Yavuz Selim Ortaokulu e Dunyayi Yasatma Dernegi (Turquía). Está financiado con 250.000 euros polo programa Erasmus+ no marco da convocatoria Cooperation partnerships in school education (KA220-SCH).

Másnoticias

Liderazgo y talento joven: así son las nuevas iniciativas emprendedoras de alumnado de la UVigo

27/03/2025

Especialistas de España e Portugal imaxinan na UVigo pasados hipotéticos e unha historia alternativa

26/03/2025

Na xornada de benvida aos socios celebrada este luns na Facultade de Ciencias, Francisco Javier Rodríguez, vicerreitor do campus de Ourense, destacou ás entidades participantes a pertinencia da temática elixida para este proxecto, tendo en conta que “na actualidade os incendios forestais e o cambio climático son temas moi relevantes e decisivos”. Pola súa banda, Eva Garea, directora da Área de Proxectos Internacionais de Educación (OPI) da UVigo, amosou a satisfacción da institución académica por participar nesta iniciativa internacional e o seu desexo de que sexa unha colaboración frutífera.

Dun xogo virtual a un mapa dixital

A UVigo lidera este proxecto da man de David Fernández Calviño, profesor e investigador da Facultade de Ciencias do campus de Ourense e director do Instituto de Agroecoloxía e Alimentación desta institución académica. Co seu equipo asume tarefas de coordinación xeral, comunicación entre socios, seguimento do plan de xestión e do orzamento e elaboración de módulos formativos para a plataforma dixital 5Green. “Os traballos clave inclúen a xestión do proxecto, a análise dos impactos ambientais e climáticos nos incendios, a alfabetización en ecosistemas forestais e a avaliación e difusión dos resultados”, sinalan desde a organización. Arredor do citado obxectivo do proxecto (amosar a conexión entre o cambio climático e os incendios forestais e pór de relevo a riqueza dos ecosistemas forestais e o seu impacto ambiental), os socio da iniciativa desenvolverán a través de catro paquetes de traballo unha plataforma dixital 5G, especialmente pensada para rapazas e rapaces, con módulos educativos, un xogo virtual, un folleto dixital sobre alfabetización ambiental e un mapa dixital que amosará as características dos espazos forestais e as causas e consecuencias dos incendios.

Ser consciente do medio ambiente e do cambio climático

Sobre a relevancia de desenvolver este proxecto, os seus socios apuntan o incremento de incendios forestais nos últimos anos e como en moitos estudos sobre eles “discutiuse a relación entre o lume e o clima e destacouse o impacto do cambio climático e o aumento das temperaturas”. As investigacións realizadas, detallan, “revelaron que condicións meteorolóxicas e climáticas como o aumento da temperatura, o incremento da seca e as ondas de calor continuas provocadas polo cambio climático causan un aumento significativo no número de incendios”. Porén, advirten, a pesar de que as “actividades humanas teñen un impacto significativo no cambio climático”, moitas persoas “non son conscientes disto”.

Neste contexto e neste século XXI, o proxecto parte da premisa de que “ser consciente do medio ambiente e do cambio climático e cumprir as responsabilidades individuais a este respecto é unha competencia básica” e que “adquirir competencias básicas a unha idade temperá é un paso máis sólido cara ao futuro” xa que cambiar comportamentos a unha idade adulta é máis difícil. “Debemos crear conciencia o antes posible e facela permanente. Considerando que os efectos humanos da contaminación ambiental están á cabeza, comprendemos que necesitamos educar á poboación para previr o cambio climático”, afirman desde a iniciativa. Neste senso, sinalan que a Comisión Europea está “renovando o seu compromiso para afrontar os retos climáticos e ambientais” e “nós necesitamos asumir esta responsabilidade como educadores, porque a xeración humana do futuro está medrando nas nosas mans e debemos sensibilizar a mocidade desde idades temperás”.

Segundo explican desde o proxecto, cando as persoas miran o bosque, neste caso pensando de xeito especial nas novas xeracións, “só ven árbores, pero o bosque é o fogar de miles de especies e tamén a fonte do osíxeno do planeta”. Así, subliñan, deberíase amosar e explicar ás persoas “non só a cara visible dos bosques, senón tamén o lado interior que non podemos ver e, entón, asumirán a responsabilidade polo medio ambiente por si mesmas”. Partindo destas premisas, dese a iniciativa destacan que “temos confianza en que, coas actividades que se organizarán entre as entidades socias do proxecto, lograremos os obxectivos establecidos e crearemos un grande impacto no público escolar sobre o bosque-medio ambiente-clima”.